Fréttir

ICAO fundar á Íslandi um notkun flugrita

19 júl. 2011



Vinnuhópur á vegum Alþjóðaflugmálastofnunarinnar (ICAO) sem fjallar um notkun og rannsóknir á flugritum í tengslum við flugslys og alvarleg flugatvik (Flight Recorder Panel) heldur fund sinn í hér á landi í dag og næstu daga. Verkefni hópsins er að fjalla um hvernig nýta má betur flugrita og hvort og hvaða umbætur eru nauðsynlegar á gerð þeirra.

RNF hafði frumkvæði að því að halda fundinn hér á landi og
innanríkisráðuneytið hýsir fundinn en um 20 sérfræðingar starfa í hópnum. Þormóður Þormóðsson og Þorkell Ágústsson eru fulltrúar Íslands á fundinum.

Starfshópur á vegum ICAO fjallar um notkun flugrita á fundi í innanríkisráðuneytinu.

Á fundinum eru saman komnir helstu sérfræðingar heims í
málefnum flugrita og eru frá ýmsum löndum og fundinn sitja einnig fulltrúar alþjóðasamtaka í flugi svo sem IATA, samtaka flugmannafélaga, flugvélaframleiðenda og fleiri. Gagnasöfnun flugrita er meðal þýðingarmestu atriða er varða rannsókn flugslysa sérstaklega þegar enginn er til frásagnar en þeir geta gefið margháttaðar upplýsingar um hvað hefur gerst þegar slys á sér stað og því eru þeir einnig mikilvægir í því skyni að auka öryggi í flugi.

Á fundinum er meðal annars rætt hvernig flugritar skulu
notaðir, hvernig hægt er að leita þá uppi þegar slys verður, hvort gera á þá þannig úr garði að unnt sé að skjóta þeim frá flugvél sem hrapar, hvort skilyrða eigi flugrita í litlar flugvélar og hvort taka eigi upp myndir í stjórnklefa. Tillögur vinnuhópsins verða síðan lagðar fyrir ICAO sem metur hvort þær eiga erindi í alþjóðareglur varðandi flugrita.
Senda grein